--------------------------------------------------------------------------------

السلام عليكم ورحمة الله وبركاته ....


كلنا نعرف أن المواطن كان له هيبته واحترامه في كل مكان في الدولة...

ولكن كلنا نعرف الان ان المواطن أصبح ولاشيء ومحد يسويله سالفه واصبح الاجنبي والسائح له كل الاولويات ولا أحد فينا يقدر يفتح حلجه...!!




كلنا نعرف أن الاماارات العربية المتحدة هي دولة واحدة..وليس سبع دول ووحدها المغفور له الشيخ زايد والشيخ راشد ال مكتوم رحمه الله....

ولكن كلنا نعرف الان ان هناك إمارة عن أمارة تفرق وتحطي قوانين لغير مواطنين الامارة تعجيزيه ويوم يجي الاجنبي او السائح يحصل الي يباه باردة ومبردة ..ليشش؟ انا بقول لانه هو من أساسيات اقتصاد الدولة؟؟؟ ههه والله حاله ..



كلنا نعرف ونستغرب قبل عشر سنوات او خمس سنوات يوم نشوف واحد ووحدة مواعدين بعض ونشوف هالشي كبير.سواء كان مواطن ولا أجنبي..!


ولكن كلنا نعرف الان أن هالشي صار عادي ..وتقريبا أصبح شي روتيني نشوفه كل مكان في المولات وفي الباركنات وفي الحدائق وفي شواطئ الدولة أجمعها من الطرف الاجنبي والطرف المواطن للاسف!! ولا حد قادر يسوي شي ويفتح حلجه بكلمة؟! وكل ماتقدم الزمن زاد هالشي.....؟

كلنا نعرف إن بنت الامارات تتميز بالحشمة واللبس المحتشم وقبل خمس او ست سنوات لو نشوف مواطنة تلبس جنز تحت العبايه نيود راسنا ونستغرب ونساسر بعض ( اويه لابسه جنز) ..!!

ولكن كلنا نعرف الان إن بعض بنات الامارات أصبح عندهم لبس الجنز وكشف الشعر ونصف الصدر شيء عادي وروتيني وطبيعي جدأ..ولااا فوق هذا الام والاب تنصح بنتها وتقول زين ماما ألبسي جي حلو وايد عليج طلعي شعرج ..بوديج الكوافير وبسويج عروس؟!!!! وللاسف محد يقدر يمنع هالشي لانه يسمونه حريه شخصيه؟!! ههه


كلنا نعرف إن الشاب الاماراتي يتميز بالأخلاق والطيب والكرم..والصفات الطيبة ( الاكثريه ) .. ...!!

ولكن كلنا نعرف الان إن بعض الشباب الاماراتي مافيه ذرة أحترام؟ ولا فيه ذرة أدب..!! ويتلفظ كلمات بذيئة في الاماكن العامة..وقدام العالم أجمع..؟ويسوي حركات سخيفه! ويستضرف دمه بشتى الطرق لدرجه انه يرقص ويهز في المراكز والمولات والاسواق.؟؟ ليش؟ لا عشان يلفت الانتباااه..!! ههه والله حاله؟


كلنا نعرف إن التخريبات واتلاف امول الدولة الي حاصلة بالمدارس والحدائق والمرافق العامة من تكسير وتخريب أكثر من يفعلها مواطنون..ورغم هذا مانتكلم ولانتفوه بكلمة أو أقتراح لوضع كاميرات ورصد المخربين ومعاقبتهم؟؟ ليششش؟؟ اكييد مابنسوي سالفه؟ لانه مال بلاش محد دافع من جيبه؟

كلنا نعرف أن الدولة تعاني من خلل التركيبة السكانية..وتم تشكيل لجان لحل هذه القضية او المشكلة..ورغم هذا نشوف كل يوم في الجريدة ( استيراد 900 الف عامل ..خصومات على التذاكر ..تنزيلات على الاتصالات والمكالمات الدولية... تمليك المنازل ..!! ..اقامة 99سنة؟)..!!سؤال كيف بنعالج هذه المشكلة ونحن نناقض بعضنا..؟؟ لييييييش؟؟ !!


كلنا نعرف أن في عوائل إماراتية فقيرة وعلى قد حالها..ومحد يدعمها بالمادة..ولاعندها مصدر رزق..ليش مايكون فيه خط تلفون ساخن للمواطنين فقط! نعم للمواطنين..او مركز بمعنى الكلمة( مش صدقة)
عشان يتواصلون فيه وتقاس الحالات الي صدق محتاجة؟؟؟ليشششششش؟
يعني لازم تنزل أسم الاسرة او العائلة كاملة في الجريدة والتلفزيون وتنعرض صورها وتنذل بعدين حد يتكرم ويتصدق عليها؟؟ ليش؟ مب من حقهم يعيشيون في بلادهم في رفاهيه حالهم حال غيرهم؟؟


كلنا نعرف أن رخصة قيادة السيارات كان صعب الواحد يحصل عليها ويقعد بالشهور ومرات بالسنين لين مايحصلها..واوراق وطلبات ومعاملات..!!؟

وكلنا نعرف الان ان رخصة قيادة السيارات أصبحت مثل بطاقة التلفون( اتصالات ) .. كل من هب ودب حصلها؟؟ < وافد جاي زيارة مدة عشرين يوم ويحصلها؟؟ وفوق هذا نقول لاااااااااا مانبا زحمه؟ نحن نسوي المستحيل عشان مايكون فيه زحمة في الامارات..!! لييشش؟ لا اونه هذا سائح ولازم نعطيه الي يباه < حتى لو نطردكم انتم ونحطه بداله ..! عادي 2015..